Te n ‘è lassa, Biaseto,
la to malinconia
e tanta nostalgia
de to discorar chieto.
La to umiltà sincera
na fede sicura
na “granda aventura”
la to poesia vera.
Sospese nel vento
de sto primo inverno
le to parole
che i era le sole
a metarne drento
el saòr de l’Eterno,
Volargne (Vr)
Dème la me chitara! Voi cantar
na canta mata, sbalinà, balenga,
par el sol che me impissa le matine
par le foiete tènare che sponta
par el vento che pètena el me
pra par el merlo che ciama primavere.
L’è ora de cantar na canta nova!
Dème l’amor e l’umiltà
che possa scrivar
versi par el Creator, poesie descalse!
E dème vosse, dème tanta vosse
che i me possa sentir drente le case,
ne le preson, de là de le montagne.
Fermève péssi, usei, albari, piere,
fermete luna,
sol, fermève stele
a scoltar el me canto imboressà
par el vostro Creator, par el me Dio!
Dème la me chitara…
Parché gai da malarse
proprio la note de Nadal!
La dovea essar la nostra prima messa
de mesanote. Ijemo passà
mi tacà al leto de un butin
a l’ultimo piano, ti in machina
a spetarme.
Son vegnù zo che mesanote
l’era passà da un pesso
e la machina cuerta de neve.
E le campane le sonàa de festa,
e i angeli i volàa sora la tera
cantando el Gloria,
e ti che te pianzei
parché te avei passà la note de Nadal
ti sola…
Note del sessantatrì
Te porto nel me libro
come na viola del pensier.
Te si el ricordo più belo e più s-ceto
de un momento
che no me capitarà mai più:
Parché in quel leto, mi lo savea,
gh’era el Bambin Gesù!
Quando sento sonar le campane
a mesanote, e i angeli che canta,
penso a la nostra prima note de Nadal:
Forsi la più bela
de sicuro la più santa!
arcopoesia 